Sivapuranam Lyrics in Tamil |  சிவபுராணம் தமிழில் 

சிவபுராணம் என்பது சிவனைப் போற்றிப் பாடும் பாடல்கள் ஆகும். சிவன் என்பவர் இந்த உலகில் வாழும் அனைத்து  உயிர்களுக்கும் கடவுள் ஆவார். சிவன் என்பவர் மயில் வாகனத்தில் செல்லும் முருகப்பெருமானுக்கும், வினை தீர்க்கும் விநாயகர் அவர்களுக்கும் தந்தையாவார். 

சிவன் இந்த உலகின் மூத்த கடவுள் ஆவார் .சிவனின் மனைவி பார்வதி ஆகும்,பார்வதி தெய்வத்தை தான் நாம் காளி, அம்மன் என வணங்கி வருகின்றோம். சிவனால் எதையும் படைக்கவும் முடியும் , அழிக்கவும் முடியும். இந்த உலகில் உள்ள துஷ்ட சக்திகளை  வேரோடு அளிப்பதே சிவனின் செயலாகும்.

இந்த உலகில் வாழும் அனைத்து ஜீவராசிகளும் ஏதாவது ஒரு துயரம் ஏற்பட்டால் முழுமனதாக சிவனை பிரார்த்தனை செய்தால் அந்த துயரம் முற்றிலும் நம் வாழ்க்கையில் இருந்து விலகிவிடும். நமது வாழ்க்கையில் எவ்வளவு கடுமையான சூழ்நிலையிலும், இக்கட்டான நிலையிலும் சிவனை முழுமனதாக பிரார்த்தனை செய்தால் கண்டிப்பாக நல்லதே நடக்கும் .

சிவனைப் போற்றுவதற்கு பல்வேறு பாடல்கள் உள்ளன இந்த பாடல்களை தினமும் சிவனை நினைத்து பாடி வந்தால் கண்டிப்பாக வாழ்க்கையில் உள்ள கஷ்டங்கள் முற்றிலும் தீர்ந்து விடும். மேலும் தமிழகத்தில் பல்வேறு பிரசித்தி பெற்ற சிவன் கோயில்கள் உள்ளன அந்த கோவில்களுக்கு தினமும் சென்று அவருக்கே உரித்தான பாடல்களை பாடி வந்தால்,கூடிய விரைவில் நம் வாழ்க்கையில் ஒரு மேன்மை நிலைக்கு நாம் செல்லலாம்.

சிவனைப் போற்றி பாடக்கூடிய பாடல்களிலும்  சிவபுராணம் மிக அருமையான பாடல் ஆகும். இந்த சிவபுராணம் கேட்கும்போதே நம் மனதில் இருக்கும் கவலைகள் பறந்து ஒரு நிம்மதியான சூழ்நிலை அமையும். இப்போதைய காலகட்டங்களில் எவருக்கும் நேரம் இல்லாமல் ஓடிக்கொண்டே இருக்கின்றோம். ஆனால் தினமும் அரை மணி நேரம் சிவபெருமானை பிரார்த்தனை செய்வதற்காக ஒதுக்கி இந்தப் பாடலை சிவனை மனதில் நினைத்து பாடி வந்தால் கண்டிப்பாக நமது குடும்பம் ஒரு மேன்மை நிலை அடையும் ,மேலும் மனக்கவலைகள் போக்கிவிடும்.

சிவபுராணம் என்னும் பாடலை கிபி ஒன்பதாம் நூற்றாண்டின்  பகுதியில்   தமிழை சங்கம் வளர்த்த மதுரை மாநகரில் இருந்து சுமார் ஒரு 7 கிலோ மீட்டர் தொலைவில் பிறந்த மாணிக்கவாசகர்  என்பவர் இயற்றியுள்ளார். அவருக்கு அவருடைய தாய் , தந்தை அவருக்கு திருவாதவூரார்  என்ற பெயரினைச் சூட்டி மகிழ்ந்துள்ளனர்.

சிவபுராணம் என்பது சைவ தமிழ் நூலின் ஒரு  பகுதியாகும். சிவபுராணம் 95 அடிகளைக் கொண்டு கலிவெண்பா பாடல் வடிவில் அமைந்துள்ளது மேலும் சிவபுராணம் நூல்  சைவர்களின் முதன்மைக் கடவுளான சிவபெருமானின் தோற்றத்தையும் இயல்பு பண்புகளையும்  விவரித்து போற்றும் வகையில் அமைந்துள்ளது. சிவபுராணம் பல நூறு ஆண்டுகள் கழித்தும் தற்போதும் அந்த பாடலை இலகுவாக பாடுவதற்கு தகுந்தாற்போல் அமைத்துள்ளார் மாணிக்கவாசகர்.

சிவபுராணம் தமிழில்

நமச்சிவாய வாழ்க நாதன் தாள் வாழ்க

இமைப்பொழுதும் என் நெஞ்சில் நீங்காதான் தாள் வாழ்க

கோகழி ஆண்ட குருமணிதன் தாள் வாழ்க

ஆகமம் ஆகிநின்று அண்ணிப்பான் தாள் வாழ்க

ஏகன் அநேகன் இறைவன் அடி வாழ்க 

வேகம் கெடுத்துஆண்ட வேந்தன் அடி வெல்க

பிறப்பறுக்கும் பிஞ்ஞகன்தன் பெய்கழல்கள் வெல்க

புறந்தார்க்குச் சேயோன் தன் பூங்கழல்கள் வெல்க

கரங்குவிவார் உள்மகிழும் கோன்கழல்கள் வெல்க

சிரம்குவிவார் ஓங்குவிக்கும் சீரோன் கழல் வெல்க 

ஈசன் அடிபோற்றி எந்தை அடிபோற்றி

தேசன் அடிபோற்றி சிவன் சேவடி போற்றி

நேயத்தே நின்ற நிமலன் அடி போற்றி

மாயப் பிறப்பு அறுக்கும் மன்னன் அடி போற்றி

சீரார் பெருந்துறை நம் தேவன் அடி போற்றி  

ஆராத இன்பம் அருளும் மலைபோற்றி

சிவன் அவன் என்சிந்தையுள் நின்ற அதனால்

அவன் அருளாலே அவன்தாள் வணங்கிச்

சிந்தை மகிழச் சிவ புராணம் தன்னை

முந்தை வினைமுழுதும் ஓய உரைப்பன் யான். 

கண் நுதலான் தன்கருணைக் கண்காட்ட வந்தெய்தி

எண்ணுதற்கு எட்டா எழிலார் கழல் இறைஞ்சி

விண் நிறைந்தும் மண் நிறைந்தும் மிக்காய், விளங்கொளியாய்,

எண்ணிறந்து எல்லை இலாதானே நின் பெரும்சீர்

பொல்லா வினையேன் புகழுமாறு ஒன்றறியேன் 

புல்லாகிப் பூடாய்ப் புழுவாய் மரமாகிப்

பல் விருகமாகிப் பறவையாய்ப் பாம்பாகிக்

கல்லாய் மனிதராய்ப் பேயாய்க் கணங்களாய்

வல் அசுரர் ஆகி முனிவராய்த் தேவராய்ச்

செல்லாஅ நின்ற இத் தாவர சங்கமத்துள் 

எல்லாப் பிறப்பும் பிறந்து இளைத்தேன், எம்பெருமான்

மெய்யே உன் பொன் அடிகள் கண்டு இன்று வீடு உற்றேன்

உய்ய என் உள்ளத்துள் ஓங்காரமாய் நின்ற

மெய்யா விமலா விடைப்பாகா வேதங்கள்

ஐயா எனவோங்கி ஆழ்ந்து அகன்ற நுண்ணியனே 

வெய்யாய், தணியாய், இயமான னாம்விமலா

பொய் ஆயின எல்லாம் போய் அகல வந்தருளி

மெய் ஞானம் ஆகி மிளிர் கின்ற மெய்ச் சுடரே

எஞ்ஞானம் இல்லாதேன் இன்பப் பெருமானே

அஞ்ஞானம் தன்னை அகல்விக்கும் நல் அறிவே 

ஆக்கம் அளவு இறுதி இல்லாய், அனைத்து உலகும்

ஆக்குவாய் காப்பாய் அழிப்பாய் அருள் தருவாய்

போக்குவாய் என்னைப் புகுவிப்பாய் நின் தொழும்பின்

நாற்றத்தின் நேரியாய், சேயாய், நணியானே

மாற்றம் மனம் கழிய நின்ற மறையோனே 

கறந்த பால் கன்னலொடு நெய்கலந்தாற் போலச்

சிறந்தடியார் சிந்தனையுள் தேன்ஊறி நின்று

பிறந்த பிறப்பு அறுக்கும் எங்கள் பெருமான்

நிறங்கள் ஓர் ஐந்து உடையாய், விண்ணோர்கள் ஏத்த

மறைந்திருந்தாய், எம்பெருமான் வல்வினையேன் தன்னை 

மறைந்திட மூடிய மாய இருளை

அறம்பாவம் என்னும் அரும் கயிற்றால் கட்டி

புறம்தோல் போர்த்து எங்கும் புழு அழுக்கு மூடி,

மலம் சோரும் ஒன்பது வாயிற் குடிலை

மலங்கப் புலன் ஐந்தும் வஞ்சனையைச் செய்ய, 

விலங்கு மனத்தால், விமலா உனக்குக்

கலந்த அன்பாகிக் கசிந்து உள் உருகும்

நலம் தான் இலாத சிறியேற்கு நல்கி

நிலம் தன்மேல் வந்தருளி நீள்கழல்கள் காட்டி,

நாயிற் கடையாய்க் கிடந்த அடியேற்குத் 

தாயிற் சிறந்த தயாவான தத்துவனே

மாசற்ற சோதி மலர்ந்த மலர்ச்சுடரே

தேசனே தேனார் அமுதே சிவபுரானே

பாசமாம் பற்றறுத்துப் பாரிக்கும் ஆரியனே

நேச அருள்புரிந்து நெஞ்சில் வஞ்சம் கெடப் 

பேராது நின்ற பெருங்கருணைப் பேராறே

ஆரா அமுதே அளவிலாப் பெம்மானே

ஓராதார் உள்ளத்து ஒளிக்கும் ஒளியானே

நீராய் உருக்கி என் ஆருயிராய் நின்றானே

இன்பமும் துன்பமும் இல்லானே உள்ளானே 

அன்பருக்கு அன்பனே யாவையுமாய் இல்லையுமாய்

சோதியனே துன்னிருளே தோன்றாப் பெருமையனே

ஆதியனே அந்தம் நடுவாகி அல்லானே

ஈர்த்து என்னை ஆட்கொண்ட எந்தை பெருமானே

கூர்த்த மெய் ஞானத்தால் கொண்டு உணர்வார் தம்கருத்தின் 

நோக்கரிய நோக்கே நுணுக்கரிய நுண்ணுணர்வே

போக்கும் வரவும் புணர்வும் இலாப் புண்ணியனே

காக்கும் என் காவலனே காண்பரிய பேரொளியே

ஆற்றின்ப வெள்ளமே அத்தா மிக்காய் நின்ற

தோற்றச் சுடர் ஒளியாய்ச் சொல்லாத நுண்ணுணர்வாய் 

மாற்றமாம் வையகத்தின் வெவ்வேறே வந்து அறிவாம்

தேற்றனே தேற்றத் தெளிவே என் சிந்தனை உள்

ஊற்றான உண்ணார் அமுதே உடையானே

வேற்று விகார விடக்கு உடம்பின் உள்கிடப்ப

ஆற்றேன் எம் ஐயா அரனே ஓ என்றென்று 

போற்றிப் புகழ்ந்திருந்து பொய்கெட்டு மெய் ஆனார்

மீட்டு இங்கு வந்து வினைப்பிறவி சாராமே

கள்ளப் புலக்குரம்பைக் கட்டழிக்க வல்லானே

நள் இருளில் நட்டம் பயின்று ஆடும் நாதனே

தில்லை உள் கூத்தனே தென்பாண்டி நாட்டானே 

அல்லல் பிறவி அறுப்பானே ஓ என்று

சொல்லற்கு அரியானைச் சொல்லித் திருவடிக்கீழ்

சொல்லிய பாட்டின் பொருள் உணர்ந்து சொல்லுவார்

செல்வர் சிவபுரத்தின் உள்ளார் சிவன் அடிக்கீழ்ப்

பல்லோரும் ஏத்தப் பணிந்து. 

திருச்சிற்றம்பலம்!!!

தென்னாடுடைய சிவனே போற்றி… எந்நாட்டவர்க்கும் இறைவா போற்றி! போற்றி!!!

இந்தப் பதிவில் உள்ள சிவபுராணத்தை நாம் தினமும் சிவனை நினைத்து ஒரு முறையாவது பாடி வந்தால் கண்டிப்பாக வாழ்க்கையில் வெற்றி நிச்சயம்.